ᓄᑖᒃ ᒪᕐᕉᒃ ᕿᒥᕐᕈᐊᒃ ᐃᓚᒋᓕᐅᑎᑎᑕᐅᓯᒪᓕᕐᑑᒃ ᐱᐊᕃᑦ ᕿᒥᕐᕈᐊᖏᓐᓄᑦ ᐊᓪᓚᖑᐊᕐᑕᕕᓂᐅᑦᓱᑎᒃ ᓄᓐᖓ ᐃᖃᓗᒻᒧᑦ. ᕿᒥᕐᕈᐊᖑᓕᕋᓗᐊᕐᑎᓗᒋᒃ ᑭᑎᑦᔪᑎᓄᐊᖓᔪᖅ ᐊᒻᒪᓗ ᐃᓄᐃᑦ ᓴᓇᕐᕈᑎᖏᑦ, ᐅᓇ ᕿᒥᕐᕈᐊᖑᓕᕐᒥᔪᖅ ᐃᓄᐃᑦ ᐊᐅᓚᒍᑎᖏᑦ. ᕿᒧᑦᓰᑦ, ᐃᓕᓵᓂᒃ ᐁᑦᓯᕋᐅᑎᒃ, ᖁᓕᒥᒎᓕᒃ/ᖁᓛᒻᒥᒎᓕᒃ. ᑲᒧᑎᑲᓪᓚᒃ/ᓯᑭᑑᖅ, ᐃᑯᐊᓚᔪᕐᓂᐊᑎ, ᖃᔭᖅ ᐊᓯᖏᓪᓗ ᐊᐅᓚᒍᑎᐅᒍᓐᓇᑐᑦ, ᑖᒃᑯᐊ ᐊᓪᓚᖑᐊᕐᓯᒪᔪᑦ ᑕᑯᑎᑦᓯᔪᑦ ᖃᓄᖅ ᓄᓇᕕᒻᒥ ᐊᐅᓚᒍᑏᑦ ᐊᓯᑦᔨᓯᒪᓕᕐᓂᖏᓐᓂᒃ. ᕿᒥᕐᕈᐊᓕᐊᖑᓯᒪᔪᑦ ᐊᕐᕌᒍᖃᓐᖏᑐᓂᑦ ᑕᓪᓕᒪᓂᒃ ᐅᑭᐅᓕᓐᓄᑦ, ᑖᒃᑯᐊ ᕿᒥᕐᕈᐊᑦ, ᓯᑕᒣᓐᖑᐊᕌᓘᓕᕐᓱᑎᒃ, ᐃᓕᓴᐅᑎᑦᓴᓯᐊᑦ ᐱᐊᕃᑦ ᑕᑦᓰᓚᕿᑎᓪᓗᒋᑦ ᐃᓕᓐᓂᐊᓂᕐᒥᒃ ᐅᖃᐅᓰᕐᓯᖏᑦᑑᒍᑕᐅᒍᓐᓇᓱᑎᐊᓪᓛᑦ. ᑖᒃᑯᐊ ᓯᑕᒣᑦ ᐊᑐᐃᓐᓇᐅᓛᕐᓂᐊᑐᑦ ᒪᓐᓂᓕᐅᑦ (ᔫᓂᐅᑉ) ᓄᓐᖑᐊᓂ 2013-ᒥ. →
ᓯᓀᑎᐊᑉ ᐅᓕᕐᓀᓯᒍᑎᓕᐊᕕᓂᖓ ᐊᖏᓂᕐᐹᓯᐊᒍᕗᖅ ᐊᑐᐊᒐᓐᖑᑎᑕᕕᓂᐅᑦᓱᓂ ᐃᓕᓐᓂᐊᕕᕐᔪᐊᑎᒍᑦ ᐅᖃᐅᓯᕐᓂᒃ ᓱᑯᐃᔦᓂᕐᒧᑦ ᐅᓕᕐᓀᓯᒍᑎᓕᐊᕕᓂᐅᑦᓱᓂ ᑲᓇᑕᒥᐅᔭᐅᑦᓱᓂ ᐃᓄᒃᑎᑐᑦ ᐅᖄᕈᓯᖓ. ᑌᒣᒐᓗᐊᕐᑎᓗᒍ ᑕᑯᓐᓇᑕᐅᓂᖃᕐᑐᓴᐅᓐᖏᑐᖅ ᐱᐅᓂᕐᐸᐅᒋᐊᖓ.
ᐊᑐᐊᒐᓕᐅᕐᑐᕕᓂᐅᑉ ᒥᑦᓵᓄᑦ
ᐊᑖᑕᒃ ᓘᓯᐊᓐ ᓯᓀᑎᐊ, ᐃᑦᓯᒐᕐᔪᐊᑯᒻᒥᐅᖅ, ᐃᓄᓐᓄᑦ ᐃᔭᐅᑎᓕᐊᓘᓂᕋᕐᑕᐅᓲᒍᑦᓱᓂ ᐊᑖᑕᑦᓯᐊᒍᓂᕋᕐᑕᐅᓲᒍᑦᓱᓂᓗ, ᐃᑦᓯᒐᕐᔪᐊᑯᓐᓄᑦ ᐊᔪᕿᕐᑐᐃᔨᖁᑎᒋᔭᐅᓐᓂᖁᖅ ᐃᓅᓕᕐᑐᕕᓂᐅᑦᓱᓂ ᐅᐃᒍᐃᑦ ᓄᓇᖓᓐᓂ ᕝᕌᓐᔅ-ᒥ ᑲᓇᑕᐅᑉ ᐅᑭᐅᕐᑕᑐᖓᓅᓚᐅᕐᑐᕕᓂᐅᑦᓱᓂ ᐊᔪᕿᕐᑐᐃᔨᐅᒋᐊᕐᑐᓱᓂ 1930-ᐄᑦ ᐊᕐᕌᒍᖏᑦᑕ ᓄᓐᖑᐊᓂ. ᐊᒥᓲᑦᔭᖏᑦᑐᓂ ᐊᕐᕌᒍᕐᑐᒌᑐᐊᕋᒥ ᐊᕐᕕᐊᒥ ᐊᒻᒪᓗ ᑕᕙᓂ (ᑭᕙᓪᓕᐅᑉ ᓯᕿᓂᖓᓂ), ᓄᑦᑎᓕᕐᓂᒥᔪᖅ ᑲᖏᕐᓱᔪᐊᖅ ᑯᐯᒻᒧᑦ, ᓯᐊᕉᓕᕐᒪᓗ ᑰᑦᔪᐊᒧᑦ ᓄᑦᑎᓕᕐᓂᒥᑦᓱᓂ. ᐊᓂᕐᕋᓗᑐᕐᒥᓄᑦ ᑕᕆᐅᑉ ᐊᑭᐊᓄᑦ ᐅᑎᓕᕐᑐᕕᓂᖅ 1974-ᒥ ᑖᕙᓃᓕᕐᓱᓂᓗ ᐃᓅᒍᓐᓀᑐᕕᓂᐅᑦᓱᓂ 1978-ᒥ.
