ᓄᓇᕕᒻᒥᐅᓅᓕᖓᔪᓂᒃ ᐊᑐᐊᒐᓐᖑᑎᑕᐅᑎᑦᓯᔨᐅᕗᒍᑦ. ᓇᓪᓕᑳᕐᓯᒪᑦᓯᐊᓱᒋᑦ ᐊᑐᐊᒐᓐᖑᑎᑕᐅᑎᓲᕗᑦ ᐊᑐᐊᒐᑦᓴᖃᓲᑦ ᐱᓇᓱᐊᕐᑕᐅᕙᑦᑐᕕᓂᕐᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ ᐅᖄᑦᓱᑎᒃ ᐃᓄᓐᓂᒃ ᓄᓇᕕᒻᒥᐅᓂᒃ ᑕᕐᕋᒥᓪᓗ – ᐃᑉᐱᒋᔭᖃᓗᐊᓐᖑᐊᓱᑕ ᓂᐱᖃᕐᑎᓯᓂᕐᒥᒃ ᐃᓄᓐᓂᒃ ᓱᓇᑐᐃᓐᓇᓂᓗ ᐃᓄᐃᑦ ᐆᒻᒪᑎᖏᓐᓂᒃ ᐃᑉᐱᓂᐊᕐᑎᓯᓲᓂᒃ ᐅᓪᓗᒥᐅᓕᕐᑐᓗ ᑕᕐᕋᒥᒃ. ᐊᑐᐊᒐᓐᖑᑎᑕᐅᑎᓯᒪᔭᕗᑦ ᑐᕌᕐᓂᖃᕋᓱᐊᕐᑐᑦ ᑐᓱᓕᕐᓭᓂᕐᒥᒃ ᑫᓪᓗᑐᐃᓂᕐᒥᓗ ᓄᑖᒍᑦᓱᓂ ᓈᒻᒪᑑᑦᓱᓂᓗ ᐅᖄᓂᕐᒥᒃ ᐱᐅᓯᐅᓯᒪᔪᓂᒃ, ᐅᓪᓗᒥ ᐱᐅᓯᐅᓕᕐᑐᓂᒃ ᐃᓄᐃᓪᓗ ᓯᕗᓂᑦᓴᖏᓐᓂᒃ, ᐊᐅᓚᔨᔭᖏᑎᒍᑦ, ᐃᓕᓐᓂᐊᕈᑎᑦᓴᐅᓱᑎᒃ ᐱᓇᓱᐊᕐᑕᕕᓂᕐᓂᒃ, ᐅᕕᒐᕐᑐᐃᑦ/ᐃᓅᓱᑦᑐᐃᑦ ᐊᑐᐊᒐᓕᐊᕆᖃᑦᑕᑕᕕᓂᖏᓐᓂᒃ ᐊᑐᐊᒐᕐᓂᓗ ᐅᖄᔪᓂᒃ ᐊᑦᔨᒌᒐᓛᓂᒃ ᖃᐅᔨᓯᒪᖃᑦᑕᓂᑯᑦᑎᓂᒃ ᐃᓅᑉ ᐊᓂᕐᑎᕆᔫᑉ ᖃᓄᐃᓕᖓᓕᕐᓂᖓᓂᒃ.

ᖃᒻᒥᓂᑕᐅᓐᖏᓂᕐᓭᑦ ᐊᑐᐊᒐᓐᖑᑎᑕᐅᒪᔪᑦ:
ᐊᕙᑕᖅ ᐱᐅᓯᑐᖃᓕᕆᕕᒃ ᐊᕙᑎᓗ ᖁᓕᓪᓘᓂ ᐊᕐᕌᒍᕐᓂ ᐊᑐᐊᒐᓐᖑᑎᑕᐅᑎᑦᓯᓯᒪᓕᕐᖁᖅ ᐱᒻᒪᕆᕋᑕᐅᑦᓱᑎᒃ ᖃᐅᔨᒋᐊᕐᕕᓴᐅᑦᓱᑎᓗ ᐅᖄᔪᓂᒃ ᐃᓄᓐᓂᒃ ᑕᕐᕋᒥᓪᓗ. ᑖᓐᓇ ᒪᑉᐱᒐᖅ ᐱᐅᔪᕋᑕᕐᒥᒃ ᐊᑐᐊᒐᑦᓴᖁᑎᓕᒃ ᑌᑦᓱᒪᓂᒋᐊᖅ ᐊᕙᑕᐅᑉ ᐊᑐᐊᒐᓐᖑᑎᑕᐅᑎᕙᑦᑕᕕᓂᖏᓐᓂᒃ ᐃᓄᒃᑎᑑᕐᓱᑎᒃ, ᖃᓪᓗᓈᑎᑑᕐᓱᑎᒃ ᐅᐃᒍᐃᑎᑑᕐᓱᑎᓗ. ᑖᒃᑯᐊ ᕿᒥᕐᕈᐊᑦ ᐊᓯᖏᓪᓗ ᐊᑐᐊᒉᑦ ᐊᑐᐊᒐᓐᖑᑎᑕᐅᖃᑦᑕᓯᒪᔪᑦ ᐃᑭᑦᑑᓈᕐᑎᑎᓪᓗᒋᑦ ᐊᑐᐃᓐᓇᐅᑎᑕᐅᖃᑦᑕᑐᕕᓂᐅᑦᓱᑎᒃ ᐃᓄᓐᓄᑦ ᓄᓇᕕᒻᒥᐅᓄᑦ. ᑖᒃᑯᓇᓂ ᒪᑉᐱᑐᒐᕐᓂ ᑕᑯᓚᖓᔪᑎᑦ ᐊᑐᐊᒐᓕᐊᕕᓃᑦ ᐃᓗᐊᓂ ᐊᒧᓚᔭᕕᓂᕐᓂᒃ ᐅᓂᒃᑳᑕᐅᖃᑦᑕᑐᕕᓂᕐᓂᑦ ᐃᓄᑐᖃᕐᓄᑦ ᐃᓄᓐᓄᑦ, ᖃᐅᔨᒪᔭᐅᒋᐊᓕᓐᓂᒃ ᖃᓄᖅ ᐱᐅᓯᑐᖃᕐᑎᒍᑦ ᑐᕐᓱᕋᐅᓰᑦ ᐱᑐᑦᓯᒪᐅᑎᒻᒪᖔᑕ ᖃᓄᕐᓗ ᓄᓇ ᐱᓂᐊᕐᓂᖃᕐᕕᐅᓲᒍᒻᒪᖔᑦ, ᐃᓄᐃᑦ ᕿᑐᕐᖓᒥᓂᒃ ᐱᕈᕐᓭᒍᓯᖏᓐᓂᒃ, ᐱᕈᕐᑐᐃᑦ ᑕᕐᕋᒦᑦᑐᑦ ᐋᓐᓂᐊᓯᐅᑎᒋᔭᐅᒍᓐᓇᓂᖏᓐᓂᒃ ᐊᓯᖏᓐᓂᓗ ᐊᒥᓱᒻᒪᕆᓐᓂᒃ. ᐃᓚᐅᔪᑦ ᑖᒃᑯᓇᓂ ᐊᑐᐊᒐᓐᖑᑎᑕᐅᒪᔪᓂ ᑌᑦᓱᒪᓂᑌᑦ ᐊᑐᐊᕐᑕᐅᒍᒪᕐᕈᐊᓲᕕᓂᐅᑦᓱᑎᒃ ᐃᓄᐃᑦ ᐃᓗᕐᕈᓯᖏᓐᓅᓕᖓᔪᑦ ᕿᒥᕐᕈᐊᑦ ᐊᑎᖃᕐᓱᑎᒃ ᑐᒥᕗᑦ.
www.avataq.qc.ca

ᓇᑯᕐᒦᒪᕆᑉᐳᒍᑦ ᐱᓇᓱᐊᖃᑎᒋᑦᓱᒋᑦ ᐃᓕᒋᓲᑦᑎᓂᒃ:

ᓄᓇᕕᒻᒥ ᐊᑐᐊᒐᓐᖑᑎᑕᐅᑎᑦᓯᕕᐅᑉ ᐱᓇᓱᐊᓲᖏᑦ ᐱᕕᖃᕐᑎᑕᐅᓪᓗᑯᑉᐸᐳᑦ ᑮᓇᐅᔭᑎᒍᑦ ᐃᑲᔪᕐᓯᒪᓲᓐᖑᐊᕌᓘᒻᒪᑕ ᐊᕙᑕᐅᑉ ᐱᓇᓱᐊᖃᑎᒋᓲᖏᑦ :

ᒪᑭᕝᕕᒃ ᑯᐊᐳᕇᓴᓐ, ᐱᒋᐊᕐᑎᓯᒍᓐᓇᓚᐅᔪᒻᒪᑦ ᐊᐅᓚᑕᐅᑎᑦᓯᓱᓂᓗ ᐊᑐᐊᒐᓐᖑᑎᑕᐅᑎᑦᓯᕕᐅᑉ ᐱᒍᑦᔨᕕᖓᓐᓂᒃ 2008-ᒥᑦ 2012-ᒧᑦ. ᒪᑭᕝᕕᒃ ᑮᓇᐅᔭᖃᕐᑎᓯᖃᑦᑕᓚᐅᔪᒻᒥᔪᖅ ᐊᒥᓱᑲᓪᓚᓂᒃ ᐊᑐᐊᒐᓐᖑᑎᑕᐅᔪᓂᒃ ᐱᓇᓱᐊᕐᑕᐅᔪᓂᓗ ᐊᑦᔨᒌᓐᖏᑐᓄᑦ ᐱᒍᑦᔨᕕᓐᓄᑦ ᐊᕙᑕᕐᒥ. ᓱᕐᕋᔪᐃᑦᑑᓱᓂ ᓴᐳᑦᔨᓯᒪᕙᓐᓂᖓ ᐊᕙᑎᓗ ᖁᓕᓪᓘᓂ ᐊᕐᕌᒎᖃᑦᑕᓚᐅᕐᑐᓂ ᐊᕙᑕᐅᑉ ᐱᓇᓱᐊᕆᐊᓕᖏᓐᓂᒃ ᑲᔪᓯᔭᐅᑎᑦᓯᒍᓐᓇᓚᐅᕐᑐᖅ ᓯᕗᒧᓪᓗ ᐱᓇᓱᐊᕐᕈᓐᓇᓯᑦᓱᓂ ᑎᓕᐅᕐᑕᐅᒪᐅᑎᒥᓂᒃ; ᐊᒻᒪᓗ

ᑯᐯᒻᒥ ᐱᐅᓯᑐᖃᓕᕆᔩᑦ, ᑐᓴᐅᒪᖃᑎᒌᓐᓂᓕᕆᔩᑦ ᐊᕐᓇᓅᓕᖓᔪᓕᕆᔩᓪᓗ ᑐᕐᖃᑕᕐᕕᖓ, ᐱᓇᓱᐊᕐᓂᒥᑎᒍᑦ ᐃᑲᔪᕐᓯᒪᓲᒍᒻᒪᑦ ᑮᓇᐅᔭᓂᒃ ᓂᖏᕐᑎᓯᕙᑦᓱᓂ 1984-ᒥᓂᑦ, ᐃᑲᔪᕐᓯᓚᕿᑦᓱᓂ ᓱᓪᓕᑕᐅᑎᓪᓗᒋᒃ ᑭᓇᒃᑰᓂᖏᑦᑕ ᐱᐅᓯᑐᖃᖓᑕᓗ ᓲᖑᔫᓂᖓᑕ ᓄᓇᕕᒻᒥᐅᑦ ᐃᓄᐃᑦ.