ᓄᑖᒃ ᒪᕐᕉᒃ ᕿᒥᕐᕈᐊᒃ ᐃᓚᒋᓕᐅᑎᑎᑕᐅᓯᒪᓕᕐᑑᒃ ᐱᐊᕃᑦ ᕿᒥᕐᕈᐊᖏᓐᓄᑦ ᐊᓪᓚᖑᐊᕐᑕᕕᓂᐅᑦᓱᑎᒃ ᓄᓐᖓ ᐃᖃᓗᒻᒧᑦ. ᕿᒥᕐᕈᐊᖑᓕᕋᓗᐊᕐᑎᓗᒋᒃ ᑭᑎᑦᔪᑎᓄᐊᖓᔪᖅ ᐊᒻᒪᓗ ᐃᓄᐃᑦ ᓴᓇᕐᕈᑎᖏᑦ, ᐅᓇ ᕿᒥᕐᕈᐊᖑᓕᕐᒥᔪᖅ ᐃᓄᐃᑦ ᐊᐅᓚᒍᑎᖏᑦ. ᕿᒧᑦᓰᑦ, ᐃᓕᓵᓂᒃ ᐁᑦᓯᕋᐅᑎᒃ, ᖁᓕᒥᒎᓕᒃ/ᖁᓛᒻᒥᒎᓕᒃ. ᑲᒧᑎᑲᓪᓚᒃ/ᓯᑭᑑᖅ, ᐃᑯᐊᓚᔪᕐᓂᐊᑎ, ᖃᔭᖅ ᐊᓯᖏᓪᓗ ᐊᐅᓚᒍᑎᐅᒍᓐᓇᑐᑦ, ᑖᒃᑯᐊ ᐊᓪᓚᖑᐊᕐᓯᒪᔪᑦ ᑕᑯᑎᑦᓯᔪᑦ ᖃᓄᖅ ᓄᓇᕕᒻᒥ ᐊᐅᓚᒍᑏᑦ ᐊᓯᑦᔨᓯᒪᓕᕐᓂᖏᓐᓂᒃ. ᕿᒥᕐᕈᐊᓕᐊᖑᓯᒪᔪᑦ ᐊᕐᕌᒍᖃᓐᖏᑐᓂᑦ ᑕᓪᓕᒪᓂᒃ ᐅᑭᐅᓕᓐᓄᑦ, ᑖᒃᑯᐊ ᕿᒥᕐᕈᐊᑦ, ᓯᑕᒣᓐᖑᐊᕌᓘᓕᕐᓱᑎᒃ, ᐃᓕᓴᐅᑎᑦᓴᓯᐊᑦ ᐱᐊᕃᑦ ᑕᑦᓰᓚᕿᑎᓪᓗᒋᑦ ᐃᓕᓐᓂᐊᓂᕐᒥᒃ ᐅᖃᐅᓰᕐᓯᖏᑦᑑᒍᑕᐅᒍᓐᓇᓱᑎᐊᓪᓛᑦ. ᑖᒃᑯᐊ ᓯᑕᒣᑦ ᐊᑐᐃᓐᓇᐅᓛᕐᓂᐊᑐᑦ ᒪᓐᓂᓕᐅᑦ (ᔫᓂᐅᑉ) ᓄᓐᖑᐊᓂ 2013-ᒥ. →
ᑖᓐᓇ ᓱᑯᐃᔦᓂᑎᒍᑦ ᓇᓗᓀᕐᓯᒐᓱᐊᕐᓂᕕᓂᖅ ᑕᑯᑎᑦᓯᒍᑕᐅᔪᕕᓂᖅ ᑲᖏᕐᓱᔪᐊᕐᒥᐅᑦ ᐃᓂᓪᓚᖓᐅᓯᕕᓂᖏᓐᓂᒃ ᐃᓕᓐᓂᐊᕕᕐᔪᐊᒨᕐᑕᕕᓂᐅᑦᓱᓂ 1964-ᒥ ᒧᓐᑐᔨᐊᑉ ᐃᓕᓐᓂᐊᕕᕐᔪᐊᖓᓂ ᐃᓕᓐᓂᐊᕇᒍᑎᑖᕈᑕᐅᒐᓱᐊᕐᓱᓂ. ᑐᓐᖓᕕᖃᕐᓱᓂ ᖃᐅᔨᔭᐅᖃᑦᑕᑐᕕᓂᕐᓂᒃ ᓄᐊᑕᐅᑦᓱᑎᒃ 1961-ᒥ 62-ᒥᓪᓗ, ᑖᓐᓇ ᐱᓇᓱᐊᕐᑕᕕᓂᖅ ᓇᓗᓀᕐᓯᔪᖅ ᐱᐅᔪᓪᓗᑐᐊᓗᓂᒃ ᐃᓄᐃᑦ ᓄᐃᑕᔪᒃᑯᑦ, ᐱᐅᓯᕆᓯᒪᔭᖏᓐᓂᒃ ᐃᓅᖃᑎᒌᑦᓯᐊᑐᐃᓐᓇᓱᑎᒃ ᖃᐅᔨᒪᔭᐅᓐᖏᓂᕐᐹᓯᐊᒍᑦᓱᑎᒃ ᐃᓅᖃᑎᒌᑦᑐᓂᒃ ᑌᑦᓱᒪᓂᐅᑎᓪᓗᒍ ᑯᐯᒻᒥ-ᓛᐸᑐᐊᒥ. ᑖᓐᓇ ᕿᒥᕐᕈᐊᖅ ᑭᓐᖒᒪᓇᕐᑐᓚᕆᒃ ᑐᑭᓯᒍᑕᐅᒍᓐᓇᕋᒥ ᓄᓇᕕᓕᒫᑦᓯᐊᒥᒃ. ᕿᒥᕐᕈᐊᖅ ᖃᓪᓗᓈᑎᑑᓚᐅᔪᒐᓂ ᖃᓪᓗᓈᑎᑑᓕᕐᑎᑕᐅᓯᒪᓕᕐᑐᖅ; ᐅᐃᒍᐃᑎᑑᕐᑐᑕᖓᓗ ᐊᔪᒐᓚᑦᓱᓂ ᐱᒐᓱᒋᐊᒥᒃ; ᐃᓄᒃᑎᑑᕐᑐᖅ ᒫᓐᓇᐅᑎᓗᒍ ᐊᑐᐃᓐᓇᕈᕐᑎᑕᐅᓕᕐᑐᖅ.
ᕿᒥᕐᕈᐊᓕᐅᕐᑐᕕᓂᐅᑉ ᒥᑦᓵᓄᑦ
Bernard Saladin d’Anglure (ᐱᕐᓈ) (1936- ) ᖃᐅᔨᒻᒫᕆᔭᐅᑦᓯᐊᓱᓂ ᐃᓅᖃᑎᒌᑦᑐᓂᒃ ᓱᑯᐃᔦᓂᑎᒍᑦ ᓇᓗᓀᕐᓯᔨᐅᕗᖅ ᐱᓇᓱᐊᖃᑎᖃᒻᒪᕆᑦᑐᕕᓂᐅᑦᓱᓂ ᐃᓄᓐᓂᒃ ᓄᓇᕕᒻᒥᐅᓂᒃ ᓄᓇᕘᕐᒥᐅᓂᓗ. ᐊᑐᐊᒐᕐᒥᒃ ᓴᓈᕐᒥᒃ ᐅᐃᒍᐃᑎᑑᓕᕐᑎᕆᓯᒪᔪᖅ. Professor Emeritus-ᒍᑦᓱᓂ ᓚᕚᓪ ᐃᓕᓐᓂᐊᕕᕐᔪᐊᖓᓂ, ᐃᓕᓐᓂᐊᑎᑦᓯᔨᐅᖃᑕᐅᑦᓱᓂ ᐃᓅᖃᑎᒌᑦᑐᓂ ᓱᑯᐃᔦᕕᒻᒥ, ᖃᐅᔨᓴᕐᑎᐅᖃᑕᐅᑦᓱᓂ CIERA-ᒥ ᐊᒻᒪᓗ Réseau Dialog-ᒥ ᒧᓐᑐᔨᐊᒥ, ᐅᓪᓗᒥᐅᓕᕐᑎᓗᒍ ᐱᕐᓈ ᐃᓄᒻᒪᕆᐅᓂᕐᒥᓄᑦ ᐱᓇᓱᐊᕈᓐᓀᑐᖅ ᑭᓯᐊᓂ ᕿᑲᓚᐅᕐᓯᒪᓐᖏᑐᖅ ᕿᒥᕐᕈᐊᓕᐅᕐᐸᓱᓂ ᐊᑐᐊᒐᑦᓴᓂᓗ, ᐃᓚᐅᕙᑦᓱᓂ ᓯᓚᕐᔪᐊᓕᒫᒨᓕᖓᔪᑦ ᐊᓪᓚᖁᑏᑦ ᐱᓇᓱᐊᕐᑕᐅᓕᑐᐊᕐᒪᑕ.
