• Toby Morantz
  • ᖃᓪᓗᓈᑎᑐᑦ – ᐃᓄᒃᑎᑐᑦ (ᐊᑦᔨᖑᐊᕐᓂ ᑭᓯᐊᓂ)
  • 2010
  • ᓯᓚᑉᐱᐊᖓ ᓯᑎᔪᖅ, 7 ¼ in. x 10 ¼ in.-ᒥᒃ ᐊᖏᓂᕐᖃᓱᓂ, 350-ᓂᒃ
  • 978-2-921644-45-7
$50.00 (CAD)

ᐃᓅᖃᑎᒌᓐᓂᕕᓃᑦ ᑕᓯᐅᔭᕐᔪᐊᑉ ᓯᕿᓂᖓᑕ ᐅᐊᓐᓂᖓᓂ

ᕿᒥᕐᕈᐊᑉ ᒥᑦᓵᓄᑦ
‘ᐊᓯᐅᓕᕐᑐᑦ ᐃᓅᖃᑎᒌᑦᑐᑦ‘  ᑌᒫᒃ ᑕᑯᓐᓇᓂᓕᕕᓃᑦ ᑲᕙᒪᒃᑯᑦ ᐱᓇᓱᑦᑎᖏᑦ ᐃᓱᒻᒥᑑᑎᑖᕐᓯᒪᔪᐃᓪᓗ ᖃᓪᓗᓈᑦ ᓄᓇᖓᓐᓃᑐᑦ 1900-ᐄᑦ ᐊᕐᕌᒍᓕᒫᑲᓵᖏᓐᓂ ᐅᖄᓕᑐᐊᕋᒥᒃ ᑕᕐᕋᒥᐅᓂᒃ. ᐃᓄᐃᑦ ᐊᓪᓓᓗ ᑯᔩᑦ ᑕᓯᐅᔭᕐᔪᐊᑉ ᓯᕿᓂᖓᑕ ᐅᐊᓐᓂᖓᓂ ᓯᑦᔭᒥᐅᑦ ᐃᓚᐅᑎᑕᐅᒐᔭᓐᖑᐊᑐᕕᓃᑦ ᑖᒃᑯᓇᓂ ᐊᓯᐅᓕᕐᑐᓂ ᐱᒻᒪᕆᐊᓗᐃᑦ ᓂᕿᒋᓲᖏᑦ ᐆᑦᑑᑎᒋᓗᒋᑦ ᕿᓚᓗᒉᑦ, ᑐᒃᑐᐃᑦ ᑭᒋᐊᕐᓗ ᓄᖑᑕᐅᑦᓯᐊᓂᕐᒪᑕ 1900-ᐄᑦ ᐊᕐᕌᒍᐃᑦ ᐱᒋᐊᕐᖃᒥᐅᑎᓪᓗᒋᑦ. ᑌᒣᒐᓗᐊᕐᑎᓗᒍ ᐊᒥᓱᕐᔪᐊᓗ ᐊᓯᑦᔨᓯᒪᓕᕋᓗᐊᕐᑎᓗᒋᑦ ᖃᓪᓗᓈᑦ ᑕᕆᐅᑉ ᐊᑭᐊᓂᒥᐅᔦᑦ ᑎᑭᑐᐊᕐᒪᑕ, ᐃᓄᐃᑦ ᐊᓪᓓᓗ ᑯᔩᑦ ᓇᕝᕚᒍᓐᓇᓯᐊᕐᑐᕕᓃᑦ ᓱᖏᐅᑎᒍᓐᓇᓂᕐᒥᒃ ᑕᒪᑦᓱᒥᖓ ᐊᓯᑦᔨᓂᕐᒥᒃ. ᐋᓪᓛᓕ, ᓯᕗᓪᓖᒃ ᖁᓖᒃ 1900-ᐄᑦ ᐱᒋᐊᕐᖃᒥᐅᑎᓪᓗᒋᑦ ᐃᓅᒍᑎᑦᓴᓯᐊᓕᕕᓈᓗᒃ ᑕᒪᖏᓐᓄᑦ ᓄᓇᖃᕐᖄᓯᒪᔫᓐᓄᑦ, ᑕᒪᒋᒃ ᓂᐅᕐᕈᓯᕙᓐᓂᕋᒥᒃ ᖃᓪᓗᓈᑦ ᐅᐃᒍᐃᒃᑯᓗ ᓂᐅᕐᕈᓯᕐᕕᖏᓐᓄᑦ ᑖᒃᑯᐊᓗ ᓂᐅᕐᕈᓯᕐᕕᓗᑳᖏᑦ ᓇᑉᐹᑎᕐᑕᑎᕕᓂᐅᓕᕐᓱᑎᒃ ᓯᑦᔭᓕᒫᒥ. ᖃᒻᒥᐅᓂᕐᓴᐅᓕᕐᑐᓕ, ᑲᕙᒣᑦ ᐃᓚᐅᓯᓐᓂᕕᓂᖏᑦ ᐊᐅᓚᑦᓯᓂᕐᒧᑦ ᑯᐯᒃ ᑕᕐᕋᖓᓂᒃ ᐅᓇᑕᕐᑐᓭᓪᓗ ᐃᓄᐃᑦ ᓄᓇᖓᓐᓅᓂᕕᓂᖏᑦ ᐱᒻᒪᕆᕋᑕᐅᑦᓱᑎᒃ ᓵᓐᖓᔭᐅᒋᐊᖃᓕᕐᓂᒥᔪᑦ ᐃᓅᒍᓯᖏᑎᒍᑦ ᑲᒪᒋᔭᐅᑦᓯᐊᒋᐊᖃᕐᓂᖏᑎᒍᓪᓗ ᐃᓄᐃᑦ ᐊᓪᓓᓗ ᑯᔩᑦ ᑕᓯᐅᔭᕐᔪᐊᑉ ᓯᕿᓂᖓᑕ ᐅᐊᓐᓂᖓᓂᒥᐅᑦ.

ᐊᑦᓱᐃᑐᒻᒪᕆᒃ ᐅᓂᒃᑳᑐᖅ ᐱᐅᓯᐅᓯᒪᔪᓂᒃ ᖃᓪᓗᓈᑎᑑᕐᓱᓂ ᒪᓕᑦᑕᐅᕗᖅ ᐱᓇᓱᐊᒻᒪᕆᑦᑕᕕᓂᕐᒧᑦ ᐊᑦᔨᖑᐊᑐᖃᕐᓄᑦ ᑐᑭᓯᓐᓇᐅᑎᖃᕐᓱᑎᒃ ᖃᓪᓗᓈᑎᑑᕐᑐᓂᒃ ᐃᓄᒃᑎᑑᕐᑐᓂᓪᓗ, ᑕᒪᓐᓇᓗ ᑐᓴᐅᒪᒍᑕᐅᑦᓱᓂ ᓄᓇᕕᐅᑉ ‘ᐱᕙᓪᓕᐊᔪᕕᓂᒻᒪᕆᐅᓂᖓᓂᒃ ᑲᑕᑦᑐᕕᓂᒻᒪᕆᐅᓂᖓᓂᓗ‘, ᐱᒋᐊᕐᑐᕕᓂᐅᑦᓱᑎᒃ 1700-ᐄᑦ ᐊᕐᕌᒍᖏᑦᑕ ᐊᑯᓐᓂᖏᓐᓂ ᒉᒻᔅ ᐯ ᑯᐯᒃ ᑕᕐᕋᖓᓂᒥᐅᓪᓗ ᐊᖏᖃᑎᒌᑐᐃᓐᓇᕋᑕᕐᑎᓗᒋᑦ ᑰᒥᒃ ᓯᒥᑦᑐᐃᓂᕐᒧᑦ 1970-ᐄᑦ ᐊᕐᕌᒍᖏᓐᓂ, ᑕᒪᓐᓇᓗ ᐊᕕᑎᑦᓯᑐᐃᓐᓇᕆᐊᖃᕐᑐᕕᓂᐅᑦᓱᓂ ᐃᓄᓐᓂᒃ ᐊᓪᓚᓂᓪᓗ ᑯᔩᓂᒃ, ᐅᕝᕙᓘᓐᓃᑦ ᑲᑎᑎᑦᓯᓚᕿᑐᐃᓐᓇᕆᐊᖃᕐᑐᕕᓂᐅᑦᓱᓂ ᑲᑐᑦᔨᓗᑎᒃ ᑯᐊᐸᓪᓗᑎᒃ ᐃᑲᔪᕐᑎᒌᓚᖓᓯᑎᓪᓗᒋᒃ. ᖃᐅᔨᒋᐊᕐᕕᓴᕐᑕᖃᕐᓱᓂ ᑕᒪᖏᓐᓂ ᐅᓂᒃᑳᑕᐅᔪᕕᓂᕐᓂᒃ ᐊᓪᓚᑕᐅᕙᑦᑐᕕᓂᕐᓂᓗ ᓂᐅᕐᕈᓯᕐᕕᓄᑦ, ᑐᒃᓯᐊᕕᓐᓄᑦ ᑲᕙᒪᒃᑯᓄᓗ, ᕿᒥᕐᕈᐊᖅ ᑕᑯᑎᑦᓯᔪᖅ ᖃᓄᖅ ᐃᓄᐃᑦ ᐃᓅᓐᓂᒪᖔᑕ 100-ᒍᓈᕐᑎᑐᓂ ᐊᕐᕌᒎᓯᒪᓕᕐᑐᓂ ᓱᖏᐅᑎᑐᐃᓐᓇᓂᕐᒪᑕ ᐊᕙᑎᖓ ᐊᓯᑦᔨᑐᐊᕐᒪᑦ ᑮᓇᐅᔭᓕᐅᕋᓱᐊᕈᑏᓪᓗ ᖃᓄᐃᑦᑐᒦᓐᓂᖏᓐᓄᑦ ᐊᒻᒪᓗ ᑲᕙᒪᒃᑯᑦ ᐊᐅᓚᑦᓯᓂᕆᕙᑦᑕᖏᓐᓄᑦ.

ᐊᑐᐊᒐᓕᐅᕐᑐᕕᓂᐅᑉ ᒥᑦᓵᓄᑦ
ᑑᐱ ᒧᕌᓐᑦᔅ ᐃᓄᖃᑎᒌᑦᑐᑦ ᐱᐅᓯᕆᓯᒪᔭᖏᓐᓂᒃ ᓱᑯᐃᔦᔨᐅᕗᖅ ᖃᐅᔨᓴᕐᐸᓱᓂ ᐱᐅᓯᕆᓯᒪᔭᖏᓐᓂᒃ ᓄᓇᖃᕐᖄᓯᒪᔪᑦ-ᐃᓄᐃᑦ ᓄᓇᖓᓐᓅᒋᐅᕐᑐᓗ ᐃᓅᖃᑎᒌᑦᓱᑎᒃ ᒉᒻᔅ ᐯ ᐅᐊᓐᓂᖓᓂ 1970-ᐄᑦ ᐊᕐᕌᒍᖏᓐᓂᓂᑦ. ᖃᐅᔨᓴᕐᓂᕕᓂᖏᑦ ᑐᓐᖓᕕᖃᕐᑐᑦ ᑲᒻᐸᓂᒃᑰᕙᓚᐅᕐᑐᑦ ᐊᓪᓚᖁᑎᒐᓴᕐᔪᐊᖏᓐᓂᑦ, ᐊᒻᒪᓗ 1900-ᐄᑦ ᐊᕐᕌᒍᖏᓐᓂ, ᑐᒃᓯᐊᕖᑦ ᑲᕙᒣᓪᓗ ᐊᓪᓚᖁᑎᖏᓐᓂᑦ, ᐅᓂᒃᑳᑐᐊᕐᓂᓗ. ᐊᑐᐊᒐᓐᖑᑎᑕᐅᑎᑦᓯᓯᒪᔪᖅ ᑐᓴᕋᑦᓴᓕᐊᕕᓂᕐᒥᓂᒃ ᐊᑐᐊᒐᕐᓂᓗ ᑕᒪᑦᓱᒨᓕᖓᔪᓂᒃ. ᖃᒻᒥᓂᑕᐅᓂᕐᐹᖅ ᐊᑐᐊᒐᓕᐊᕕᓂᖓ ᐊᑎᓕᒃ ᐆᒥᖓ: The White Man’s Gonna Getcha ᐊᒻᒪᓗ ᐊᑐᐊᒐᓕᐊᕕᓂᕆᒻᒥᔭᖓ ᐆᒥᖓ ᐊᑎᓕᒃ: The Colonial Challenge of the Crees in Quebec ᓵᓚᖃᐅᑎᒋᓚᐅᔪᕙᐅᒃ ᓵᓚᖃᐅᑎᑖᕐᓱᓂ ᐆᒥᖓ: Raymond Klibansky Prize ᑲᓇᑕᒥᐅᑦ ᑲᑐᑦᔨᖃᑎᒌᓐᓂᖓᓂᑦ ᓯᓚᕐᔪᐊᒥᐅᑦ ᐃᓅᖃᑎᒌᑦᑐᐃᓗ ᓱᑯᐃᔦᔭᕐᓂᖏᓐᓄᑦ ᐊᑐᐊᒐᓕᐅᕐᑐᕕᓂᐅᓂᖓᓄᑦ ᖃᓪᓗᓈᑎᑑᕐᑐᒥᒃ ᓱᑯᐃᔦᔦᔪᕕᓂᐅᑦᓱᓂ ᓯᓚᕐᔪᐊᒥᐅᓂᑦ 2002-03-ᒥ. ᒧᕌᓐᑦᔅ ᐃᓄᑐᖃᐅᓂᑯᒥᓄᑦ ᐱᓇᓱᒍᓐᓀᑐᖅ ᐃᓚᒋᔭᐅᑦᓱᓂ ᐃᓅᖃᑎᒌᑦᑐᑦ ᐱᐅᓯᕆᓯᒪᔭᖏᑦ ᓱᑯᐃᔭᕐᑕᐅᓂᖏᓐᓄᑦ ᐱᒍᑦᔨᕕᖓᓐᓂ, ᒪᑭᓪ ᐃᓕᓐᓂᐊᕕᕐᔪᐊᖓᓐᓂ.