ᓄᑖᒃ ᒪᕐᕉᒃ ᕿᒥᕐᕈᐊᒃ ᐃᓚᒋᓕᐅᑎᑎᑕᐅᓯᒪᓕᕐᑑᒃ ᐱᐊᕃᑦ ᕿᒥᕐᕈᐊᖏᓐᓄᑦ ᐊᓪᓚᖑᐊᕐᑕᕕᓂᐅᑦᓱᑎᒃ ᓄᓐᖓ ᐃᖃᓗᒻᒧᑦ. ᕿᒥᕐᕈᐊᖑᓕᕋᓗᐊᕐᑎᓗᒋᒃ ᑭᑎᑦᔪᑎᓄᐊᖓᔪᖅ ᐊᒻᒪᓗ ᐃᓄᐃᑦ ᓴᓇᕐᕈᑎᖏᑦ, ᐅᓇ ᕿᒥᕐᕈᐊᖑᓕᕐᒥᔪᖅ ᐃᓄᐃᑦ ᐊᐅᓚᒍᑎᖏᑦ. ᕿᒧᑦᓰᑦ, ᐃᓕᓵᓂᒃ ᐁᑦᓯᕋᐅᑎᒃ, ᖁᓕᒥᒎᓕᒃ/ᖁᓛᒻᒥᒎᓕᒃ. ᑲᒧᑎᑲᓪᓚᒃ/ᓯᑭᑑᖅ, ᐃᑯᐊᓚᔪᕐᓂᐊᑎ, ᖃᔭᖅ ᐊᓯᖏᓪᓗ ᐊᐅᓚᒍᑎᐅᒍᓐᓇᑐᑦ, ᑖᒃᑯᐊ ᐊᓪᓚᖑᐊᕐᓯᒪᔪᑦ ᑕᑯᑎᑦᓯᔪᑦ ᖃᓄᖅ ᓄᓇᕕᒻᒥ ᐊᐅᓚᒍᑏᑦ ᐊᓯᑦᔨᓯᒪᓕᕐᓂᖏᓐᓂᒃ. ᕿᒥᕐᕈᐊᓕᐊᖑᓯᒪᔪᑦ ᐊᕐᕌᒍᖃᓐᖏᑐᓂᑦ ᑕᓪᓕᒪᓂᒃ ᐅᑭᐅᓕᓐᓄᑦ, ᑖᒃᑯᐊ ᕿᒥᕐᕈᐊᑦ, ᓯᑕᒣᓐᖑᐊᕌᓘᓕᕐᓱᑎᒃ, ᐃᓕᓴᐅᑎᑦᓴᓯᐊᑦ ᐱᐊᕃᑦ ᑕᑦᓰᓚᕿᑎᓪᓗᒋᑦ ᐃᓕᓐᓂᐊᓂᕐᒥᒃ ᐅᖃᐅᓰᕐᓯᖏᑦᑑᒍᑕᐅᒍᓐᓇᓱᑎᐊᓪᓛᑦ. ᑖᒃᑯᐊ ᓯᑕᒣᑦ ᐊᑐᐃᓐᓇᐅᓛᕐᓂᐊᑐᑦ ᒪᓐᓂᓕᐅᑦ (ᔫᓂᐅᑉ) ᓄᓐᖑᐊᓂ 2013-ᒥ. →
ᑐᓴᕐᓂᔮᕐᑎᓯᒍᑎᐅᑉ ᖃᓄᐃᑦᑑᓂᖓ
ᐱᐅᓯᑐᖃᖅ ᑲᑎᓯᔪᖅ ᐅᓪᓗᒥᓂᑕᕐᓂᒃ “ᐱᐊᕋᕗᑦ” ᐱᓯᒪᔪᒥᑦ ᐃᓄᒻᒥᑦ ᐃᖕᖏᑎᒥᑦ ᓓᓇ ᑐᓪᓚᐅᒐᕐᒥᑦ. ᓯᑕᒪᐅᔪᖕᖏᒐᕐᑐᑦ ᐃᖕᖏᑕᕕᓂᖏᑦ ᑕᕝᕙᓂ ᓂᐱᑦᓴᔭᒥ ᓵᑦᑐᔮᒥ ᐅᖃᐅᓯᕐᑕᓕᒃ ᐃᓄᑦᑎᑐᑦ ᐊᒻᒪᓗ ᓴᖑᐊᒍᓯᖏᑦ ᐱᓯᒪᑦᓱᑎᒃ pop-folk-country ᓴᖑᐊᒍᓯᖏᓐᓂᑦ. ᑐᓪᓚᐅᒐᖅ ᐅᐊᕈᑎᒌᑦᑎᓯᔪᖅ ᑲᑕᑦᔭᓂᕐᒥᒃ ᐃᓕᒪᑎᑦᓯᓱᑎᒃ ᐃᖕᖏᑕᒥᓄᑦ. ᐃᖕᖏᓱᓂᓗ ᐊᒻᒪᓗ ᑲᑕᑦᔭᓱᓂᓗ, ᑐᓪᓚᐅᒐᖅ ᑯᑭᑕᐸᐅᑎᒥᒃ ᐊᑐᕐᑐᖅ. ᑐᓴᕐᓴᖁᑎᑕᖃᕐᓱᓂ ᓂᐱᓕᐊᕕᓂᖏᓐᓂᒃ ᐃᐊᕆᒃ ᐳᔭᓵᑉ (ᐃᑯᒪᐅᑎᒨᕐᑐᓄᑦ ᑯᑭᑕᐸᑦᓱᓂ ᐊᒻᒪᓗ ᑯᑭᑕᐸᐅᑎᑐᐃᓐᓇᓂᒃ, ᓂᐸᓕᔭᕐᑎᓯᐅᑎᓂᒃ, ᒪᕐᕈᐃᓂᓪᓗ ᐊᑦᔨᒌᖕᖏᑑᓐᓂᒃ ᑯᑭᑕᐸᐅᑏᓐᓂᒃ ᐊᑐᕐᓱᓂ), ᒪᕐᑎᑦ ᐱᕆᐊᑦ (ᐊᑦᓴᑕᕐᑐᖅ) ᐊᒻᒪᓗ ᑖᓂᐊᓪ ᑯᑐᔪ (ᓇᕐᓂᑐᕋᕐᑐᖅ, ᖃᑎᑐᓂᕐᓴᒥᒃ ᑯᑭᑕᐸᑦᑐᖅ, ᓂᐸᖃᕐᑎᓯᐅᑎᒥᓪᓗ). ᑐᓪᓚᐅᒐᐅᑉ ᓂᐱᖓ ᓂᐱᑦᓯᐊᖅ ᐊᒻᒪᓗ ᖃᑎᑑᒍᑦᓱᓂ, ᐊᒻᒪᓗ ᑌᒣᑦᑑᒐᒥ ᐃᓕᑕᕐᓇᓯᑦᓴᐅᑎᒋᒍᓐᓇᓱᓂ, ᑕᕝᕙᓂᑦᓭᓇᖅ ᐃᖕᖏᑕᒥᓂᒃ ᑲᑎᒪᑎᑦᓯᓱᓂ ᐱᐅᓯᑐᖃᕐᑎᒍᑦ ᐊᒻᒪᓗ ᐅᓪᓗᒥᓂᑕᕐᓂᒃ ᐃᖕᖏᖑᐊᕈᓯᓂᒃ. “ᐱᐊᕋᕗᑦ” ᓂᐱᑦᓴᔭᖅ ᓵᑦᑐᔮᖅ ᑐᓴᕐᓂᒋᔭᐅᓯᑲᐱᒍᓐᓇᑐᖅ ᐊᓕᐊᒋᔭᐅᑲᐱᒍᓐᓇᓯᓲᑦ ᓂᐱᓕᐊᕕᓂᖓ ᓄᓇᖃᕐᑳᑐᕕᓃᑦ ᑐᓴᕐᓂᔮᕐᑎᓯᔩᑦ ᓂᐱᖏᓐᓂᒃ ᐊᓕᐊᒋᔭᓕᓐᓄᑦ.
ᐃᖕᖏᑎ ᑭᓇᐅᒻᒪᖔᑦ
ᓓᓇ ᑐᓪᓚᐅᒐᖅ ᐃᓅᓕᕐᑐᕕᓂᖅ ᐳᕕᕐᓂᑐᖅ ᓄᓇᕕᒻᒥ 1961-ᒥ. ᒪᓐᑐᔨᐊᓚᒧᑦ ᓅᑦᑐᕕᓂᖅ ᑭᖑᓂᖓᒍᑦ ᐊᒻᒪᓗ ᐃᓅᒍᓐᓀᑐᕕᓂᐅᑦᓱᓂ 2014-ᒥ. ᐸᓂᐊᐱᐅᑦᓱᓂ, ᐊᖓᔪᕐᖄᒥᓄᑦ ᑫᓪᓗᑐᕐᑕᐅᕙᑦᑐᕕᓃᒃ ᐊᖓᔪᖏᓪᓗ ᓄᑲᖏᓪᓗ ᐃᖕᖏᖑᐊᖁᔭᐅᑦᓱᑎᒃ. ᐊᑖᑕᒥᓄᑦ ᓂᐅᕕᕈᑦᔭᐅᕙᑦᑐᕕᓃᑦ ᐱᖕᖑᐊᕈᑎᓂᒃ ᑐᓴᕐᓂᔮᕐᑎᓯᐅᑎᓂᒃ ᐱᒋᐅᕐᓴᕈᑎᒋᓂᐊᕐᑕᖏᓐᓂᒃ, ᐃᑲᔪᕐᓯᔭᐅᓯᒪᔪᑦ ᑐᓴᕐᓂᔮᕐᑎᓯᐅᑎᓂᒃ ᐱᒋᐊᕐᕕᓕᑉᐸᓕᐊᒍᓐᓇᓯᑦᓱᑎᒃ. ᐊᒻᒪᓗᑦᑕᐅᖅ, ᐊᓈᓇᒥᓄᑦ, ᐋᓚᓯᒧᑦ, ᑲᑕᑦᔭᕆᐅᕐᓴᑎᑕᐅᕙᑦᑐᕕᓂᐅᑦᓱᑎᒃ. ᑕᑯᓐᓇᐅᔮᕐᑕᐅᓯᒪᔪᖅ ᐊᑦᔨᒌᖕᖏᑐᓂ ᐱᖕᖑᐊᓂᕐᓂ ᐅᑭᐅᕐᑕᑐᒥ, ᐊᒻᒪᓗ ᔨᐅᔪᑉᒥ, ᒪᓐᑐᔨᐊᓚᒥ ᐊᒻᒪᓗ ᑯᐯᒻᒥ. ᐱᖕᖑᐊᕆᐊᕐᑐᖃᑕᐅᓯᒪᒻᒥᔪᖅ ᑲᑕᑦᔭᖃᑎᖃᕐᓱᓂ ᐊᓈᓇᒥᓂᒃ ᒪᓐᑐᔨᐊᓚᒥ.
