ᓄᓇᕕᒻᒥ ᐊᑐᐊᒐᓐᖑᑎᑕᐅᓯᒪᓕᕐᑐᑦ

ᑑᒪᓯ ᖁᐃᑦᓴᖅ – ᑑᒪᓯ ᖁᐃᑦᓴᖅ

ᑐᓴᕐᓂᔮᕐᑎᓯᒍᑎᐅᑉ ᖃᓄᐃᑦᑑᓂᖓ

ᑑᒪᓯ ᖁᐃᑦᓴᐅᑉ ᑕᓪᓕᒪᐅᔪᕐᑐᑦ ᐊᑕᐅᓯᕐᓘᑐᑦ ᐃᖕᖏᖑᐊᕈᓯᖏᑦ ᐃᓄᑦᑎᑐᑐᐃᓐᓇᖅ. ᐃᖕᖏᖑᐊᕈᓯᖃᓲᖅ Blues-Rock, ᐃᓚᖓᓐᓂ Country and Western, ᐊᒻᒪᓗ ᐊᓯᖏᓐᓂ Progressive Rock. ᑑᒪᓯᐅᑉ ᓂᐱᖓ ᐃᓕᑕᕐᓇᑐᖅ, ᐊᓕᐊᖕᖑᐊᓂᕐᒥᓂᒃ ᑐᓴᕐᓴᐅᑎᑦᓯᖃᑦᑕᓱᓂ ᐃᓄᑦᑎᑐᑦ ᐅᖃᐅᓰᑦ ᐃᓚᖏᓐᓂᒃ ᐅᖃᓕᕋᒥ, ᓇᓗᓇᖃᑦᑕᔭᑎᓐᓇᒋᑦ ᐅᖃᕐᑕᖏᑦ ᐊᑦᔨᒌᒍᑦᓱᑎᒃ ᐆᑦᑑᑎᒋᑦᓱᒍ “ᓯᑯᓕᐊᕐᓯᐊᔪᐃᑦᑐᖅ”. ᐃᖕᖏᖑᐊᕐᑕᕕᓂᖏᑦ ᑲᑎᕐᓱᓯᒪᔪᑦ ᑖᒃᑯᓇᓂ ᓈᓚᒐᑦᓴᓂ ᓂᐱᓕᐅᑦᓯᐊᓯᒪᔪᑦ ᐊᒻᒪᓗ ᑕᕐᕋᒥ ᑐᓴᕐᓂᕆᔭᐅᑦᓱᑎᒃ.

ᐃᖕᖏᑎ ᑭᓇᐅᒻᒪᖔᑦ

ᑑᒪᓯ ᓄᓇᖃᕐᓯᒪᔪᖅ ᓂᐅᖁᖕᖒᒥᒃ ᐳᕕᕐᓂᑑᑉ ᐊᒻᒪᓗ ᐊᑯᓕᐅᑉ ᐊᑯᓐᓂᖓᓂ, ᑖᕙᓂ ᐃᓅᓕᕐᑐᕕᓂᐅᑦᓱᓂ ᐊᐅᒍᓯᑎ 28, 1948-ᒥ. 1976-ᒍᓕᕐᑎᓗᒍ ᐃᓚᖏᓪᓗ ᓅᑦᑐᕕᓃᑦ ᐊᑯᓕᕕᒻᒧᑦ ᑖᕙᓂᒥᐅᒍᓕᕐᑐᖅ 2-ᓂᒃ ᕿᑐᕐᖓᖃᕐᓱᓂ. ᐊᒥᓱᑦ ᐃᓄᖏᑦ ᑖᕙᓂ ᑌᒣᑦᑑᒪᑕ, ᐃᓅᓯᕐᒥᓄᑦ ᐃᓚᐅᑎᑦᓯᔪᖅ ᒪᙯᓐᓂᒥᒃ ᐊᒻᒪᓗ ᐃᖃᓗᑦᓯᐅᓂᕐᒥᒃ, ᐃᓚᖓᓐᓂᓗ ᓴᓇᐅᒐᓲᒍᑦᓱᓂ. ᐃᓕᓴᕆᐊᕐᓯᒪᑦᓱᓂ ᑐᓗᑦᑕᕕᒻᒥ 1976-ᒥ, ᐊᓕᐊᒋᔭᖃᓯᔪᕕᓂᖅ ᑐᓴᕐᓂᔮᕈᑎᓂᒃ ᑕᑯᓐᓇᐅᔮᕐᑐᕕᓂᐅᑦᓱᓂ ᐱᓕ ᑖᓐᓴᓐ ᐱᖕᖑᐊᑎᖏᓐᓂᓗ ᑯᑭᑕᐸᐅᑎᒥᒃ ᐊᑐᕆᐅᕐᓴᓯᔪᕕᓂᖅ ᑖᒃᑯᓂᖓ ᑕᑯᓐᓇᐅᔮᕐᑐᕕᓂᐅᑦᓱᓂ. ᑭᖑᓂᖓᒍᑦ, ᑑᒪᓯ ᐊᓪᓚᖃᑦᑕᓕᕐᑐᕕᓂᖅ ᐃᖕᖏᖑᐊᕋᑦᓴᓂᒃ ᐊᒻᒪᓗ ᐊᑦᔨᒌᖕᖏᑐᓂ ᓄᓇᓕᓐᓂ ᑕᑯᓐᓇᐅᔮᕐᑎᓯᒋᐊᕐᑐᖃᑦᑕᓕᕐᑐᕕᓂᖅ. ᐊᓕᐊᒋᔭᐅᕙᓪᓕᐊᓕᕐᓱᓂ, ᐊᕐᕕᑕᖃᑦᑕᓕᕐᑐᕕᓂᖅ ᐅᑯᓄᖓ ᓄᓇᕗᑦ, ᓄᓇᕕᒃ, ᐊᓐᑎᐊᔨᔪ, ᐊᒻᒪᓗ ᑯᐯᒃ ᑕᑯᕙᓪᓚᑕᐅᓯᒪᔪᖅ ᓰᐲᓰ-ᑯᓄᑦ ᒪᓐᑐᔨᐊᓚᒥ ᓯᕗᓪᓕᐹᒥ ᑖᒃᑯᓄᖓ ᓂᐱᓕᐅᕐᑕᐅᔪᕕᓂᖅ Boot Records-ᑯᓄᑦ, ᓯᕗᓪᓕᐹᒥ ᓂᐱᑦᓴᔭᖕᖑᑎᑦᓯᔪᕕᓂᖅ ᓵᑦᑐᔮᓃᑦᑎᓗᒋᑦ ᓂᐱᓕᐅᕐᑕᐅᓱᓂ ᐃᓄᒃᓱᒃ ᓂᐱᓕᐅᕆᔨᓄᑦ. 2008-ᒥ ᐃᓅᒍᓐᓀᑐᕕᓂᖅ.