ᓄᑖᒃ ᒪᕐᕉᒃ ᕿᒥᕐᕈᐊᒃ ᐃᓚᒋᓕᐅᑎᑎᑕᐅᓯᒪᓕᕐᑑᒃ ᐱᐊᕃᑦ ᕿᒥᕐᕈᐊᖏᓐᓄᑦ ᐊᓪᓚᖑᐊᕐᑕᕕᓂᐅᑦᓱᑎᒃ ᓄᓐᖓ ᐃᖃᓗᒻᒧᑦ. ᕿᒥᕐᕈᐊᖑᓕᕋᓗᐊᕐᑎᓗᒋᒃ ᑭᑎᑦᔪᑎᓄᐊᖓᔪᖅ ᐊᒻᒪᓗ ᐃᓄᐃᑦ ᓴᓇᕐᕈᑎᖏᑦ, ᐅᓇ ᕿᒥᕐᕈᐊᖑᓕᕐᒥᔪᖅ ᐃᓄᐃᑦ ᐊᐅᓚᒍᑎᖏᑦ. ᕿᒧᑦᓰᑦ, ᐃᓕᓵᓂᒃ ᐁᑦᓯᕋᐅᑎᒃ, ᖁᓕᒥᒎᓕᒃ/ᖁᓛᒻᒥᒎᓕᒃ. ᑲᒧᑎᑲᓪᓚᒃ/ᓯᑭᑑᖅ, ᐃᑯᐊᓚᔪᕐᓂᐊᑎ, ᖃᔭᖅ ᐊᓯᖏᓪᓗ ᐊᐅᓚᒍᑎᐅᒍᓐᓇᑐᑦ, ᑖᒃᑯᐊ ᐊᓪᓚᖑᐊᕐᓯᒪᔪᑦ ᑕᑯᑎᑦᓯᔪᑦ ᖃᓄᖅ ᓄᓇᕕᒻᒥ ᐊᐅᓚᒍᑏᑦ ᐊᓯᑦᔨᓯᒪᓕᕐᓂᖏᓐᓂᒃ. ᕿᒥᕐᕈᐊᓕᐊᖑᓯᒪᔪᑦ ᐊᕐᕌᒍᖃᓐᖏᑐᓂᑦ ᑕᓪᓕᒪᓂᒃ ᐅᑭᐅᓕᓐᓄᑦ, ᑖᒃᑯᐊ ᕿᒥᕐᕈᐊᑦ, ᓯᑕᒣᓐᖑᐊᕌᓘᓕᕐᓱᑎᒃ, ᐃᓕᓴᐅᑎᑦᓴᓯᐊᑦ ᐱᐊᕃᑦ ᑕᑦᓰᓚᕿᑎᓪᓗᒋᑦ ᐃᓕᓐᓂᐊᓂᕐᒥᒃ ᐅᖃᐅᓰᕐᓯᖏᑦᑑᒍᑕᐅᒍᓐᓇᓱᑎᐊᓪᓛᑦ. ᑖᒃᑯᐊ ᓯᑕᒣᑦ ᐊᑐᐃᓐᓇᐅᓛᕐᓂᐊᑐᑦ ᒪᓐᓂᓕᐅᑦ (ᔫᓂᐅᑉ) ᓄᓐᖑᐊᓂ 2013-ᒥ. →
ᑕᕝᕙᓂ ᐃᓅᓯᕆᓯᒪᔭᒥᓂᒃ ᐅᓂᒃᑳᓱᓂ ᐃᓄᒃᑎᑑᕐᑎᓗᒍ ᐅᐃᒍᐃᑎᑑᓕᕐᑎᑕᕕᓂᕐᒥ, ᖁᒪᖅ ᑕᑯᓐᓇᑐᖅ ᓯᓚᕐᔪᐊᒥᒃ ᓇᒻᒥᓂᕐᒥᓅᓕᖓᓪᓚᕆᑦᑎᓗᒍ ᖃᐅᔨᒪᔪᒻᒪᕆᐅᑦᓱᓂᓗ ᑕᑯᓐᓇᑕᕐᒥᒍᑦ, ᐅᖄᒐᒥ ᐊᓯᑦᔨᓂᒻᒪᕆᕕᓂᕐᓂᒃ 1900-ᐄᑦ ᐊᕐᕌᒍᖏᓐᓂ. ᖃᐅᔨᒪᑦᓱᓂ ᐊᐅᓚᔫᓕᐊᕆᔭᐅᓚᐅᕐᓯᒪᔪᒥᒃ ᐅᔮᐳᑦ ᕙᓕᐊᔭᑎᒧᑦ Nanook of the North-ᒥᒃ, ᓯᓚᕐᔪᐊᒥ ᑐᖓᓕᐊᓂᒃ ᐅᓇᑕᕐᓂᔪᐊᖃᕐᑎᓗᒍ, ᑯᐯᑉ ᐃᒻᒥᓂᕐᓱᕈᒪᓕᕐᓂᖓᓄᑦ – ᐊᔪᒉᑦᑑᓱᓂ ᐃᓅᖃᑎᒥᑕ ᓴᓂᐊᓂᑦ, ᑎᒍᓯᓪᓚᕆᑦᑐᑐᕕᓂᖅ ᕋᓃ ᓚᕕᐊᒃ-ᒥᒃ ᐃᑦᔪᐊᓯᒍᒪᓕᕐᓱᓂ – ᓯᕗᓪᓕᐹᒥ ᐊᖏᖃᑎᒌᒍᑎᕕᓃᑦ ᐃᓱᓕᑐᐃᓐᓇᕋᑕᕐᑎᓗᒋᑦ ᓄᓇᕕᐅᑉ ᐃᒻᒥᓂᕐᓱᕈᒪᓕᕐᓂᖓᓄᑦ, ᖁᒪᖅ ᑕᑯᓯᒪᔪᖅ ᐃᓚᐅᓯᒪᑦᓱᓂᓗ ᐃᓄᐃᑦ ᓯᓚᕐᔪᐊᖓᑕ ᐊᓯᑦᔨᕙᓪᓕᐊᓯᓐᓂᖓᓄᑦ. ᐃᓅᓯᕆᓯᒪᔭᕐᒥᓂᒃ ᐅᓂᒃᑳᓂᕕᓂᖓ ᐱᒻᒪᕆᕋᑕᐅᑦᓱᓂ ᐊᓪᓚᖁᑎᐅᕗᖅ, ᑕᒣᓐᓄᑦ ᐃᓄᓐᓄᑦ ᐃᑦᔪᐊᓯᒐᑦᓴᖃᕈᒪᔪᓄᑦ, ᐊᒻᒪᓗ ᓯᓚᕐᔪᐊᓕᒫᒥ ᐊᑐᐊᕐᓯᔨᓄᑦ ᑕᑯᓚᕿᓛᕐᒪᑕ ᖁᒪᐅᑉ ᐅᖃᐅᓯᖓᑎᒍᑦ ᐱᐅᔪᓪᓚᕆᐅᑦᓱᓂ ᐱᐅᓯᑐᖃᕐᑎᒎᕐᓱᓂᓗ ᓯᓚᕐᔪᐊᒥᒃ.
ᐊᑐᐊᒐᓕᐅᕐᑐᕕᓂᐅᑉ ᒥᑦᓵᓄᑦ
1914-ᒥ ᑖᒧᓯ ᖁᒪᖅ ᐃᓅᓕᕐᑐᕕᓂᐅᕗᖅ ᐃᓄᑦᔪᐊᑉ ᓴᓂᐊᓂ. ᐱᓇᓱᐊᕐᑐᕕᓂᐅᒐᓗᐊᕐᓱᓂ ᑲᒻᐸᓂᒃᑯᑦ ᓂᐅᕕᕐᕕᖓᓐᓂ ᐳᕕᕐᓂᑑᓪᓗ ᑯᐊᐸᖓᓂ, ᐳᕕᕐᓂᑐᕐᒥᐅᓄᑦ ᓯᕗᓕᕐᑎᕆᔭᐅᓕᕐᓂᒥᔪᖅ ᐱᖓᓲᔪᕐᑐᓂ ᐊᕐᕌᒍᕐᓂ. ᐊᓪᓚᐸᓪᓕᐊᖃᑦᑕᓯᔪᕕᓂᖅ 1970-ᐄᑦ ᐊᕐᕌᒍᖏᓐᓂ, ᓯᕗᓪᓕᐹᒥᒃ ᐊᑐᐊᒐᓕᐅᕐᓱᓂ ᐃᓄᐃᑦ ᐱᐅᓯᑐᖃᖏᓐᓅᓕᖓᔪᒥᒃ, ᑭᖑᓂᖓᒍᓪᓗ ᐃᓄᒃᑎᑑᕐᓱᓂ ᐅᓕᕐᓀᓯᒍᑎᓕᐅᕐᓱᓂ, ᐊᑯᓂᑲᓪᓚᒃ ᑖᑦᓱᒥᖓ ᐅᓕᕐᓀᓯᒍᑎᓕᐅᕐᑐᕕᓂᖅ 1991-ᒥ ᐊᑐᐊᒐᓐᖑᑎᑕᐅᑐᐃᓐᓇᕋᑕᕐᑎᓗᒍ ᐊᕙᑕᖅ ᐱᐅᓯᑐᖃᓕᕆᕕᒻᒧᑦ ᐃᓄᒃᓯᐅᑏᑦ ᑲᑐᑦᔨᖃᑎᒌᓐᓂᖓᓄᓗ. ᑖᒧᓯ ᖁᒪᖅ ᓇᒻᒥᓂᕐᒥᓅᓕᖓᔪᒥᒃ ᐊᑐᐊᒐᓐᖑᑎᑕᐅᑎᑦᓯᓯᒪᒻᒥᔪᖅ, ᐊᓯᖏᓐᓂᓗ ᐊᒥᓱᒐᓛᓂᒃ ᐊᑐᐊᒐᓕᐅᕐᓯᒪᑦᓱᓂ ᐃᓘᓐᓇᓕᒫᑲᓵᖏᑦ ᐊᑐᐊᒐᓐᖑᑎᑕᐅᕋᑕᓐᖏᑐᓂᒃ. ᑖᒧᓯ ᖁᒪᖅ (1914-1993) ᑕᑯᓐᓇᑕᐅᓂᖃᓚᐅᔪᖅ ᐃᓱᒪᒐᓱᐊᕐᑎᓚᕆᐅᓂᕐᐸᐅᒋᐊᖓ ᓄᓇᕕᒻᒥᐅᓂᑦ ᐃᓄᓐᓂᑦ.
ᐃᑲᔪᕐᑎᖃᕐᓱᑕ les Presses de l’Université du Québec-ᑯᓐᓂᒃ
