ᓄᓇᕕᒻᒥ ᐊᑐᐊᒐᓐᖑᑎᑕᐅᓯᒪᓕᕐᑐᑦ

ᐋᓚᓯ ᑐᓪᓚᐅᒐᖅ/ᓘᓯ ᐊᒪᕈᐊᓕᒃ – ᑲᑐᑦᔭᑐᑦ

ᑐᓴᕐᓂᔮᕐᑎᓯᒍᑎᐅᑉ ᖃᓄᐃᑦᑑᓂᖓ

ᑲᑕᑦᔭᑑᒃ ᐋᓚᓯ ᐊᒻᒪᓗ ᓘᓯ, ᑖᒃᑯᐊ ᓂᐸᖏᒃ ᐊᑦᔨᐅᖏᓪᓕᑕᕐᑑᒃ ᐊᒻᒪᓗ ᐃᓕᑕᕐᓇᑎᑦᓯᓱᑎᒃ ᓂᐸᓂᒃ ᐊᒻᒪᓗ ᐅᓂᒃᑳᖑᐊᓂᒃ ᑕᑯᑦᓴᐅᑎᑦᓯᒍᓐᓇᓱᑎᒃ ᓄᓇᑐᐃᓐᓇᐅᑉ ᐱᐅᓯᖓᓂᒃ, ᓄᓇᒥᒃ ᐊᒻᒪᓗ ᐆᒪᔪᓂᒃ ᐅᑭᐅᕐᑕᑑᑉ ᓄᓇᖓᓃᓲᓂᒃ. ᑖᒃᑯᐊ ᓈᓚᒐᑦᓭᑦ ᓵᓚᓐᓃᒍᑕᐅᓯᒪᔪᑦ “ᐱᐅᓂᕐᐹᑦ ᐱᐅᓯᑐᖃᕐᑎᒍᕐᑐᑦ ᓈᓚᒐᑦᓭᑦ-ᑖᕙᖕᖓᓂᑕᐅᑦᓱᑎᒃ” ᑳᓇᑕᒥ ᓄᓇᖃᕐᖄᑐᕕᓃᑦ ᐃᖕᖏᖑᐊᕐᑏᑦ ᐱᓕᐅᑎᑎᑕᐅᕕᖓᓂ ᑐᔮᓐᑐᒥ. ᓂᐱᓕᐅᕐᓯᒪᔪᑦ 14 ᐱᖕᖑᐊᑕᕕᓂᖏᑦ, ᐃᓚᐅᑎᓪᓗᒋᑦᑕᑭᔪᐃᑦ ᐊᒻᒪᓗ ᐱᒐᓱᐊᒻᒪᕆᓐᓇᕈᓀᑦ ᐃᖕᖏᖑᐊᕈᓰᑦ, ᐆᑦᑑᑎᒋᑦᓱᒋᒃ “ᐱᐊᕋᒥᑦ ᐃᓇᖁᑎᒃ,” ᑐᓴᕐᓴᐅᑎᑦᓯᓚᕆᑦᑑᒃ ᑲᑕᑦᔭᖃᑎᒌᒃ ᐱᓯᑎᒻᒪᕆᐅᓂᒋᓐᓂᒃ. ᑭᓇᑐᐃᓐᓇᑯᑦ ᑕᑯᒍᒪᔪᑦ ᑐᓴᕆᐅᕐᓇᑐᓂᒃ, ᑖᓐᓇᑕᒐ ᓂᐱᑦᓴᔭᖅ ᓵᑦᑐᔮᖅ ᐱᑕᓕᒃ ᑭᓇᑐᐃᓐᓇᑯᑦ ᓈᓚᒐᑦᓴᖏᓐᓂᒃ ᐳᐃᒍᕐᓴᐅᖏᑦᑐᓂᒃ.

ᐃᖕᖏᑏᒃ ᑭᓇᒃᑰᒪᖔᓐᓃᒃ

ᐋᓚᓯ ᐊᒻᒪᓗ ᓘᓯ ᐃᓅᒃ ᐊᕐᓈᒃ ᐳᕕᕐᓂᑐᖅ, ᓄᓇᕕᒻᒥᐅᒃ. ᐃᓱᒪᒋᔭᐅᔫᒃ ᑲᑐᑦᔭᓯᑎᐅᓂᕐᐸᐅᒋᐊᖏᒃ ᐅᑭᐅᕐᑕᑐᓕᒫᒥ. ᐃᓄᐃᑦ ᐱᐅᓯᑐᖃᖏᓐᓂᒃ ᓄᐃᑕᑎᑦᓯᒋᐊᖃᕆᐊᒥᒃ ᖃᐅᔨᒪᑦᓯᐊᑑᒃ ᑲᑕᑦᔭᓂᑎᒍᑦ, ᑌᒣᒐᒥᒃ ᐅᕕᒃᑲᓂᒃ ᑲᑕᑦᔭᕆᐅᕐᓴᑎᑦᓯᖃᑦᑕᑐᕕᓃᒃᒃ ᑖᕗᖓᓕᒫᖅ ᑲᑕᑦᔭᓂᕐᒥᒃ ᑲᔪᓯᔭᐅᖁᔨᑦᓱᑎᒃ ᕿᑐᕐᖓᕇᓄᑦ. ᐋᓚᓯ ᐊᒻᒪᓗ ᓘᓯ ᑲᑕᑦᔭᕆᐅᕐᑐᕕᓃᒃ 9-10 ᐅᑭᐅᖃᕐᓱᑎᒃ ᐃᓕᓐᓂᐊᑎᑕᐅᑦᓱᑎᒃ ᐊᓈᓇᒥᓄᑦ ᐊᒻᒪᓗ ᐊᓈᓇᑦᓯᐊᒥᓄᑦ. ᑲᑕᑦᔭᖃᑎᒌᖕᖑᑐᕕᓃᒃ 1970-ᓂ ᐊᒻᒪᓗ ᑌᑦᓱᒪᓂᓂᑦ ᓯᓚᕐᔪᐊᓕᒫᒦᑦᓯᒪᓕᕐᓱᑎᒃ. ᑲᑕᑦᔭᕈᓯᖏᑦ ᐆᒪᔪᕚᓪᓛᖑᐊᒍᓲᑦ, ᑲᑕᑦᔭᐸᑦᑕᕕᓂᖏᑦ ᐊᓈᓇᒋᑦᑕ ᐊᓈᓇᒋᓐᓄᑦ ᐊᒻᒪᓗ ᐊᓈᓇᒋᓐᓄᑦ. ᑌᑦᓱᒪᓂ ᑲᑕᑦᔭᖃᑦᑕᑐᕕᓃᒃ ᑲᑎᒪᓂᖃᕐᑎᓗᒋᑦ ᐃᓄᐃᑦ, ᖁᕕᐊᓲᑎᖃᕐᓱᑎᓪᓗ ᐆᒪᔪᕆᐅᕐᑐᖃᕐᒪᑦ ᐊᖑᑏᑦ ᑎᑭᒻᒪᑕ ᒪᙯᑦᑐᕕᓂᐅᑦᓱᑎᒃ. ᐊᓈᓇᒋᔦᓪᓗ ᑲᑕᑦᔭᐸᑦᑐᕕᓂᐅᑦᓱᑎᒃ ᕿᑐᕐᖓᒥᓂᒃ ᓯᓐᓇᓭᑦᓱᑎᒃ. ᐅᓪᓗᒥᓕ ᐊᓕᐊᒋᔭᐅᒻᒪᕆᑉᐸᓕᕐᒪᑦ ᑲᑕᑦᔭᓂᖅ ᓯᓚᕐᔪᐊᓕᒫᒧᑦ ᑲᑕᑦᔭᕆᐊᕐᑐᓯᒪᓕᕐᑑᒃ. 1990-ᓂ ᑕᒪᕐᒥᒃ ᓄᐃᑕᓯᒪᔫᒃ ᐊᐅᓚᔫᓂ ᐊᖓᒃᑯᖅ ᐱᖕᖑᐊᑎᓪᓚᕆᐅᑎᓪᓗᒍ ᑕᑯᓐᓇᒐᐅᑦᓱᓂ ᓘ ᑌᒪᓐ ᕕᓕᑉᔅ. ᐊᐅᓚᓯᒪᔫᒃ ᐊᒥᐊᔨᑲᐅᑉ ᑕᕐᕋᓕᒫᖓᓂ, ᔨᐅᔪᑉᒥ, ᐊᒻᒪᓗ 10 ᓄᓇᕐᓓᑦ ᐅᖓᑖᓄᑦ ᑲᑕᑦᔭᑎᓪᓗᒋᒃ ᑐᓵᔭᐅᒋᐊᕐᑐᓱᑎᒃ ᑕᑯᓐᓈᑎᑦᓯᒋᐊᕐᑐᓱᑎᒃ.

ᐋᓚᓯ ᑐᓪᓚᐅᒐᖅ ᐃᓅᓕᕐᑐᕕᓂᖅ ᐁᐸᔭᓕ 20, 1935-ᒥ ᓄᓇᓕᐊᕈᕐᓂ ᐅᓪᓗᒥ ᐳᕕᕐᓂᑑᓕᕐᑑᑉ ᓴᓂᐊᓂ ᐊᒻᒪᓗ ᑖᕙᓂ ᓄᓇᖃᕐᓯᒪᑦᓱᓂ ᐅᓪᓗᒥᒧᑦ. ᑲᑎᑎᑕᐅᓯᒪᔪᖅ 1955-ᒥ ᐊᒻᒪᓗ ᕿᑐᕐᖓᖃᕐᓱᓂ 8-ᓂᒃ ᐊᒻᒪᓗ 2-ᓂᒃ ᑎᒍᐊᖃᕐᓱᓂ. ᐊᒥᓱᓂᒃ ᑲᒃᑲᓛᓂᒃ ᐃᓕᓐᓂᐊᑎᑦᓯᓯᒪᔪᖅ ᐅᑭᐅᓕᓐᓂᒃ 6-ᓂᑦ 11-ᓄᑦ.

ᓘᓯ ᐊᒪᕈᐊᓕᒃ ᐃᓅᓕᕐᑐᕕᓂᖅ ᐊᒃᑑᐸ 16, 1934-ᒥ ᑲᖏᕐᓱᕈᐊᒥ, ᓄᓇᓕᐊᕈᕐᒥ ᐅᓪᓗᒥ ᐳᕕᕐᓂᑑᓕᕐᑑᑉ ᓴᓂᐊᓂ. ᐳᕕᕐᓂᑐᒥ 1955-ᒥ ᑲᑎᑎᑕᐅᔪᕕᓂᖅ ᐊᒻᒪᓗ 8-ᓂᒃ ᕿᑐᕐᖓᖃᕐᓱᓂ. ᐃᓅᒍᓐᓀᑐᕕᓂᖅ 2005-ᒥ.