ᓄᑖᒃ ᒪᕐᕉᒃ ᕿᒥᕐᕈᐊᒃ ᐃᓚᒋᓕᐅᑎᑎᑕᐅᓯᒪᓕᕐᑑᒃ ᐱᐊᕃᑦ ᕿᒥᕐᕈᐊᖏᓐᓄᑦ ᐊᓪᓚᖑᐊᕐᑕᕕᓂᐅᑦᓱᑎᒃ ᓄᓐᖓ ᐃᖃᓗᒻᒧᑦ. ᕿᒥᕐᕈᐊᖑᓕᕋᓗᐊᕐᑎᓗᒋᒃ ᑭᑎᑦᔪᑎᓄᐊᖓᔪᖅ ᐊᒻᒪᓗ ᐃᓄᐃᑦ ᓴᓇᕐᕈᑎᖏᑦ, ᐅᓇ ᕿᒥᕐᕈᐊᖑᓕᕐᒥᔪᖅ ᐃᓄᐃᑦ ᐊᐅᓚᒍᑎᖏᑦ. ᕿᒧᑦᓰᑦ, ᐃᓕᓵᓂᒃ ᐁᑦᓯᕋᐅᑎᒃ, ᖁᓕᒥᒎᓕᒃ/ᖁᓛᒻᒥᒎᓕᒃ. ᑲᒧᑎᑲᓪᓚᒃ/ᓯᑭᑑᖅ, ᐃᑯᐊᓚᔪᕐᓂᐊᑎ, ᖃᔭᖅ ᐊᓯᖏᓪᓗ ᐊᐅᓚᒍᑎᐅᒍᓐᓇᑐᑦ, ᑖᒃᑯᐊ ᐊᓪᓚᖑᐊᕐᓯᒪᔪᑦ ᑕᑯᑎᑦᓯᔪᑦ ᖃᓄᖅ ᓄᓇᕕᒻᒥ ᐊᐅᓚᒍᑏᑦ ᐊᓯᑦᔨᓯᒪᓕᕐᓂᖏᓐᓂᒃ. ᕿᒥᕐᕈᐊᓕᐊᖑᓯᒪᔪᑦ ᐊᕐᕌᒍᖃᓐᖏᑐᓂᑦ ᑕᓪᓕᒪᓂᒃ ᐅᑭᐅᓕᓐᓄᑦ, ᑖᒃᑯᐊ ᕿᒥᕐᕈᐊᑦ, ᓯᑕᒣᓐᖑᐊᕌᓘᓕᕐᓱᑎᒃ, ᐃᓕᓴᐅᑎᑦᓴᓯᐊᑦ ᐱᐊᕃᑦ ᑕᑦᓰᓚᕿᑎᓪᓗᒋᑦ ᐃᓕᓐᓂᐊᓂᕐᒥᒃ ᐅᖃᐅᓰᕐᓯᖏᑦᑑᒍᑕᐅᒍᓐᓇᓱᑎᐊᓪᓛᑦ. ᑖᒃᑯᐊ ᓯᑕᒣᑦ ᐊᑐᐃᓐᓇᐅᓛᕐᓂᐊᑐᑦ ᒪᓐᓂᓕᐅᑦ (ᔫᓂᐅᑉ) ᓄᓐᖑᐊᓂ 2013-ᒥ. →
ᑐᓴᕐᓂᔮᕐᑎᓯᒍᑎᐅᑉ ᖃᓄᐃᑦᑑᓂᖓ
ᑐᓴᕐᓂᕆᔭᐅᓂᕐᐹᒍᓯᒪᔪᓄᑦ ᐃᓚᐅᔪᖅ ᓄᓇᕕᒻᒥᓂᑕᖅ ᐅᑎᕐᓯᒪᓕᕐᑐᖅ ᐊᑎᖃᓕᕐᑎᓗᒍ ᑖᓐᓇ ᓂᐱᑦᓴᔭᖅ ᓵᑦᑐᔮᒦᑦᑐᖅ ᐃᖕᖏᑕᕕᓂᖓ ᓵᓕ ᐋᑕᒥᐅᑉ. “ᖁᕕᐊᓱᑉᐳᖓ”, ᒪᕐᕈᐃᓕᖓᑎᑕᖅ ᓄᑖᒥ ᓂᐱᑦᓴᔭᒥ. ᓵᓕᐅᑉ ᓂᐱᖓ ᑐᓴᕐᓴᒪᕆᐅᑎᑕᐅᓕᒫᕐᑐᖅ 13-ᓂ ᐃᓕᒃᑰᑎᕐᑐᓂ. ᐃᖕᖏᖃᑦᑕᑕᕕᓂᖏᑦ ᓂᐱᓕᐅᓕᕐᕿᑕᐅᓯᒪᔪᑦ ᑕᕝᕙᓂ. ᐊᓕᐊᒋᔭᐅᓂᕐᐹᒍᒍᓐᓇᕕᓖᑦ ᐃᓘᓐᓇᑎᒃ ᐃᖕᖏᑕᖏᑦ ᐆᑦᑑᑎᒋᑦᓱᒋᑦ “ᐊᐅᓚᔨᖕᖏᓚᑎᑦ”, “ᐊᓇᕐᕋᕈᒪᓪᓕᐳᖓ”, ᐊᒻᒪᓗ ᐱᓗᐊᕐᑐᒥᒃ “ᐅᐱᕐᖔᒥ” ᑐᓴᕐᓂᑐᐊᐱᐅᒻᒥᔪᓂᒃ ᐃᖕᖏᑐᖃᕐᓱᓂ, ᓂᐱᖃᑦᓯᐊᒥᔪᓂᒃ. Folk Rock-ᓚᔭᐅᓲᑦᓴᔭᖅ, ᐃᓄᑦᑎᑑᕐᓱᓂ, ᑯᑭᑕᐸᐅᑎᕙᓪᓛᖃᕐᓱᓂᓗ, ᐃᓚᖓ country-ᓚᔭᐅᓲᑦᓴᔭᐅᑦᓱᓂ “ᐅᓂᒃᑳᐳᖓ”, ᐊᒻᒪᓗ ᐃᓚᖏᑦ rock-ᓚᔭᐅᓲᑦᓴᔭᕐᑕᖃᕐᒥᓱᑎᒃ ᓂᐱᖏᑦᑕ.
ᐃᖕᖏᑎ ᑭᓇᐅᒻᒪᖔᑦ
ᓵᓕ ᐋᑕᒻᔅ ᐃᓅᓕᕐᑐᕕᓂᖅ 1952-ᒥ ᐃᓪᓗᒥ ᐊᐳᑎᒥ ᖁᕕᐊᓱᕝᕕᐅᓛᓕᕐᑎᓗᒍ ᖃᐅᖓᓂ. ᐃᓄᑦᔪᐊᒥ ᐳᐊᑦ ᐊᐅᔨᓴᓐ-ᓚᔭᐅᕙᓚᐅᕐᑐᒥ 8 kilometers-ᓂᒃ ᐅᖓᓯᓐᓂᓕᒻᒥ ᐃᓄᑦᔪᐊᒥᓪᓗ ᐃᓕᓴᓯᔪᕕᓂᐅᑦᓱᓂ, ᐃᓚᒌᑦ ᐳᕕᕐᓂᑐᒧᑦ ᐊᐅᓪᓛᑐᕕᓃᑦ, ᐃᓕᓴᕇᕐᑐᕕᓂᐅᑦᓱᓂ ᑖᕙᓂ ᐳᕐᑐᓂᕐᓴᓂᒃ ᓅᓚᐅᕋᓂ ᑰᑦᔪᐊᕌᓗᒻᒧᑦ 1973-ᒥ ᑖᕙᓂ ᐃᓕᓴᕐᓂᒥᓂᒃ ᐳᕐᑐᓂᕐᓴᒋᐊᓪᓚᓂᒃ ᐱᔭᕇᕐᑐᕕᓂᖅ. ᐳᕕᕐᓂᑐᒥ ᐱᒋᐊᕐᑎᓯᔪᕕᓂᖅ ᑐᓴᕐᓂᔮᑎᓯᔨᐅᖃᑎᒌᓂᒃ ᐊᑎᖃᕐᓱᑎᒃ ᓯᑯᒥᐅᑦ ᐊᒻᒪᓗ ᓂᕿᑦᓯᑐᓂ ᐅᓐᓄᑐᒃᑯᑕᒫᑦ ᐱᖕᖑᐊᖃᑦᑕᑐᕕᐅᑦᓱᑎᒃ. 1976-ᒥ, ᐃᓄᑦᔪᐊᒧᑦ ᓅᒋᐊᓪᓚᓕᕐᑐᕕᓂᖅ ᑖᕙᓂᓗ ᓄᑖᓂᒃ ᑐᓴᕐᓂᔮᕐᑎᓯᔨᐅᖃᑎᒌᓂᒃ ᐱᒋᐊᕐᑎᓯᓯᒪᑦᓱᓂ. ᑌᑦᓱᒪᓂ ᐊᓪᓚᖃᑦᑕᓯᓐᓂᖁᖅ ᐃᖕᖏᖑᐊᕋᑦᓴᓂᒃ ᐃᓄᐃᑦ ᐱᐅᓯᑐᖃᖓᓄᐊᖓᔪᓂᒃ, ᐃᓄᐃᑦ ᐱᒋᐊᕐᐸᓕᐊᓯᒪᓂᖏᓐᓄᓗ, ᐅᓂᒃᑳᑐᐊᓄᓗ ᐊᒻᒪᓗ ᐅᓂᒃᑳᓄᑦ ᐊᒻᒪᓗ ᐃᓄᐃᑦ ᐃᓅᒡᒍᓯᖓᓄᑦ. ᑌᒣᓘᕐᓱᓂ ᐱᕙᓪᓖᒋᐊᕈᑎᖃᖃᑦᑕᑐᕕᓂᖅ ᐱᒻᒪᕆᐅᓂᖓᓂᒃ ᐃᓄᐃᑦ ᐃᓗᒡᒍᓯᖓᑕ ᐃᓕᑦᓯᑎᒋᐊᕐᓱᒋᑦ ᐅᕕᒐᕐᓂᓭᑦ. ᑌᑦᓱᒪᓂᒥᑦ, ᐱᖕᖑᐊᕆᐊᕐᑐᖃᑦᑕᓕᕐᑐᕕᓂᖅ ᓄᐊᔅ ᐊᒥᐊᔨᑲᓕᒫᒥ ᐊᒻᒪᓗ ᔨᐅᔪᑉᒥ. ᙯᖁᔭᐅᓐᓂᒥᑦᓱᓂᓗ ᑲᑎᓯᒋᐊᕐᑐᓱᓂ ᑐᓴᕐᓂᔮᕐᑎᓯᒋᐊᕐᑐᓱᓂᓗ ᕼᐊᓚᓐ ᐊᑕᓂᐊᓗᖓᓂᒃ ᔪᓕᐊᓇᒥᒃ. ᓵᓕ ᐃᓅᒍᓐᓀᑐᕕᓂᖅ 2008-ᒥ. ᑲᑎᑎᑕᐅᒪᓚᐅᕐᓯᒪᔪᖅ ᐊᒻᒪᓗ ᑕᓪᓕᒪᓂᒃ ᕿᑐᕐᖓᖃᕐᓱᓂ.
