$10.00 (CAD)

ᓵᓕ ᓂᖏᐅᖅ – ᐃᓅᖃᑎᒃ

ᑐᓴᕐᓂᔮᕐᑎᓯᒍᑎᐅᑉ ᖃᓄᐃᑦᑑᓂᖓ

ᐃᓅᑦᓯᐊᕆᑦ ᓂᐱᖃᑦᓯᐊᑐᖅ ᐊᓕᐊᓇᕐᓱᓂᓗ ᐃᖕᖏᖑᐊᕈᓯᖅ. ᐃᓅᖃᑎᒃ, ᑕᓪᓕᒪᐅᔪᖕᖏᒐᕐᑐᓂᒃ ᓈᓚᒐᑦᓴᑕᓕᒃ ᓈᓚᒐᑦᓴᖑᕐᑕᐅᓯᒪᑦᓱᓂ ᐃᓄᒃᓱᑦ ᓂᐱᓕᐅᕐᑎᓄᑦ 1997 ᐅᐱᕐᖔᖓᓂ. ᓵᓕ ᓂᖏᐅᖅ – ᐃᖃᓗᒻᒥᐅᕕᓂᐅᑦᓱᓂ, ᐃᓄᑦᔪᐊᒥᐅᒍᓕᕐᑐᖅ – ᐃᖕᖏᕈᓯᖃᕙᓪᓗᑐᖅ ᑖᒃᑯᓇᓂ progressive rock, ᐊᒻᒪᓗ ᓈᓚᒋᐊᒥᒃ ᐃᓱᐊᕐᑑᓱᑎᒃ. ᑯᑭᑕᐸᕝᕙᓛᕐᑕᓖᑦ ᐃᓘᓐᓇᑎᒃ ᓂᐸᑭᓐᓂᓴᐅᒪᔪᒥᒃ ᓂᐱᓕᐊᕕᓂᓕᒫᓂ ᓵᑦᑐᔮᓃᑦᓱᑎᒃ.

ᐃᖕᖏᑎ ᑭᓇᐅᒻᒪᖔᑦ

ᓵᓕ ᐃᓅᓕᕐᑐᕕᖅ 1963-ᒥ ᐃᖃᓗᐃᑦ, ᓄᓇᕗᒻᒥ (ᕿᑭᕐᑖᓗᒻᒦᑐᖅ ᑳᓇᑕᐅᑉ ᐅᑭᐅᕐᑕᑐᖓᓂ) ᐊᒻᒪᓗ ᑌᑦᓱᒪᓂ ᑐᓴᕐᓂᔮᕐᑎᓯᓂᕐᒥᒃ ᐱᒋᐊᕐᕕᓕᑦᓯᒪᑦᓱᓂ, ᐃᖃᓗᓐᓂ ᓯᕗᓪᓕᐹᑦᓴᔭᓂ ᐃᓕᓴᓯᓱᓂ. 1970-ᓂ, ᐃᓕᓴᕐᕕᒧᑦ ᐱᓱᑦᓱᓂ ᐃᖕᖏᖑᐊᕐᓱᓂᓘᕐᐸᑐᕕᓂᖅ. ᓯᕗᓪᓕᐹᒥ ᑯᑭᑕᐸᐅᑎᒥᒃ ᑎᒍᓯᔪᕕᓂᖅ 12-ᓂᒃ ᐅᑭᐅᖃᕐᓱᓂ 1979-ᒥ ᑌᑦᓱᒪᓂᓗ ᐱᒋᐊᕐᓱᓂ ᐅᕕᒐᕐᓂᓭᑦ ᐳᕐᑐᓂᕐᓴᖏᓐᓃᕕᖓᓂᒃ ᐃᓕᓴᕐᕕᒥ. ᑌᑦᓱᒪᓂ ᐃᓕᑦᓯᓯᐊᕐᓂᖏᑦᑐᖅ ᑭᓯᐊᓂ ᓅᑦᓯᒪᓕᕐᓱᓂ ᐃᓄᑦᔪᐊᒧᑦ ᓄᓇᕕᒻᒥ ᐱᒋᐊᓪᓚᕆᑦᓯᒪᔪᖅ. ᑖᕙᓂ ᐃᓚᓐᓈᖏᓪᓗ ᐱᖕᖑᐊᑎᖕᖑᑐᕕᓃᑦ ᑌᑦᓱᒪᓂᑕᒐ ᓄᕐᖃᕈᒣᕐᓂᖁᖅ ᑐᓴᕐᓂᔮᕐᑎᓯᔨᐅᓂᕐᒥᒃ.

ᒪᓕᑉᐸᓚᐅᕋᓗᐊᕐᓱᓂ ᐱᖕᖑᐊᑎᐅᖃᑎᒥᓂᒃ ᐃᓚᓐᓈᒥᓂᒃ ᐊᕐᕌᒍᐃᑦ 4-5 ᓴᓂᐊᓂ, ᓇᒻᒥᓂᖅ ᐱᒋᐊᕐᑐᕕᓂᖅ ᐊᑐᕐᓱᓂ ᐱᖕᖑᐊᕈᑎᓂᒃ ᓄᓇᓕᓐᓂ ᑲᑎᒪᔨᒃᑯᑦ ᐱᖕᖑᐊᕈᑎᖏᓐᓂᒃ. ᓄᓇᕕᒻᒥᐅᑦ ᑐᓴᕐᓂᔮᕐᑎᓯᔩᑦ ᑐᓵᓕᓂᕆᑦᓱᒋᑦ ᑖᒃᑯᓂᖓ ᐱᔪᑦᓴᐅᔮᕈᑎᖃᓯᔪᕕᓂᖅ ᐆᑦᑑᑎᒋᑦᓱᒋᑦ ᓯᑯᒥᐅᑦ,  ᓴᒃᓗᒃ ᐱᖕᖑᐊᑏᑦ, ᓵᓕ ᐋᑕᒻᔅ, ᐊᒻᒪᓗ ᐱᓗᐊᕐᑐᒥᒃ ᐅᐃᓕᐊᒃᑯᑦ ᐱᖕᖑᐊᑎᖏᑦ ᐃᓄᑦᔪᐊᒥᐅᑦ. ᐃᓘᓐᓇᑎᒃ ᐃᖕᖏᖑᐊᕈᑦ soft rock-ᓂᒃ ᐊᒻᒪᓗ ᐃᓚᖏᑦ hard rock-ᓂᒃ ᑖᒃᑯᓄᖓ ᖃᓄᐃᓕᖕᖓᑕᐅᓯᒪᑦᓱᓂ ᐱᖕᖑᐊᕈᓯᕐᒥᑎᒍᑦ, ᓵᓕᐅᑉ ᐱᖕᖑᐊᕈᓯᖏᓐᓂᑎᑑᕐᑐᓂᒃ. ᐱᖕᖑᐊᑎᐅᖃᑎᖏᓪᓗ ᐱᒋᐅᕐᓴᓯᒪᓕᕐᓱᑎᒃ ᐊᕐᕌᒍᓕᒫᒥ ᑕᑯᓐᓇᐅᔮᕐᑎᓯᖃᑦᑕᓯᔪᕕᓃᑦ ᓄᓇᓕᓐᓂ ᑲᑎᒪᕕᒻᒥ ᓂᕿᑦᓯᑐᓂᒃ ᐅᓐᓄᑐᒃᑯᑕᒫᑦ.

ᐅᖄᔭᐅᖃᑦᑕᓕᕐᑐᕕᓂᖅ ᑐᓴᕐᓂᔮᕐᑎᓯᔨᐅᒋᐊᖓ ᑕᕐᕋᓕᒫᒥ ᐅᑭᐅᕐᑕᑐᓕᒫᒥᓪᓗ ᐱᖕᖑᐊᕆᐊᕐᑐᖁᔭᐅᕙᓕᕐᓱᓂ. ᐱᖕᖑᐊᑎᐅᓂᕐᒥᓂ, ᓇᒻᒥᓂᖅ ᓈᓚᒐᑦᓴᓕᐊᕆᓯᒪᔭᒥᓂᒃ ᐃᖕᖏᖑᐊᓲᖅ. ᐊᕐᕌᒍᒥ ᐃᓄᓐᓄᑦ ᑯᓐᓇᐅᔮᕐᑕᐅᖃᑦᑕᓕᕐᓱᓂ, ᓵᓕᐅᑉ ᐱᖕᖑᐊᑎᖏᑦ ᓯᕗᓪᓕᐹᒥ ᐱᖕᖑᐊᑐᕕᓃᑦ ᐃᓄᑦᔪᐊᒥ ᐱᖕᖑᐊᓂᕐᔪᐊᖃᕐᑎᓗᒍ ᓄᓇᕕᒻᒥ, ᐊᒻᒪᓗ ᑭᖑᓂᖓᒍᑦ ᑕᕐᕋᓕᒫᒧᑦ ᓇᒧᑐᐃᓐᓇᖅ ᐱᖕᖑᐊᕆᐊᕐᑐᖃᑦᑕᓕᕐᑐᕕᓂᖅ.